ராஜா சந்திரசேகர் கவிதைகள்: March 2018

Sunday, March 18, 2018

இந்தக் கவிதையை

எழுதும் போது

நான் இறந்துகொண்டிருக்கிறேன்

இந்தக் கவிதையை

படிக்கும் போது

நீங்கள் பிறந்துகொண்டிருக்கிறீர்கள்

உன் எழுத்தில்

ஈரம் இருக்கிறது

நான் சொல்லுவேன்

அது நீங்கள் தந்தது

துளிக்கண்ணீரைத்

துடைத்துக்கொண்டு

மெளனத்துள் மூழ்கிப் போவோம்

சிறைக்கம்பிகளுக்கு
அருகில் போய்
கம்பியைத் தட்டிப்பார்த்து
ஒரு துண்டு வெட்டியெடுத்து
துளைகளிட்டு
புல்லாங்குழலாக்கி
வாசிக்கத் தொடங்கினான்

அம்மா குழந்தைக்கு
கதை சொன்னபோது
முதல் குண்டு வெடித்தது

கதை பாதியிலிருந்தபோது
இரண்டாவது குண்டு வெடித்தது

அவர்களோடு
முடியாத கதையும் இறந்து கிடந்தது

எல்லோரும்
அவரவர் உலகத்தில்

புல்லாங்குழல்
வாசிக்கும் சிறுவன்

கேட்டபடி
போகும் ரயில்